John 21
UJesu Lommangaliso Wokubamba Inhlanzi
1Ngemuva kwesikhathi uJesu waphinda waziveza kubafundi bakhe eLwandle lwaseThibheriya. Kwenzakala kanje: 2USimoni Phethro, loTomasi (othiwa nguDidimu) loNathaneli waseKhana eseGalile, lamadodana kaZebhedi labanye abafundi ababili babendawonye. 3USimoni Phethro wabatshela wathi, “Ngisayagola inhlanzi” bona bathi, “Sizahamba lawe.” Ngakho baphuma bayangena esikepeni, kodwa kababambanga lutho ngalobobusuku. 4Ekuseni kakhulu uJesu wema ekhunjini, kodwa abafundi kabananzelelanga ukuthi kwakunguJesu. 5Wabamemeza wathi, “Bangane, lilokhu lingabambanga nhlanzi yini?” Baphendula bathi, “Hatshi.” 6Wathi, “Phosani umambule wenu ngasekunene kwesikepe lizazuza khona. Bathe sebenze njalo behluleka ukudonsa umbule ngenxa yobunengi bezinhlanzi. 7Lowomfundi owayethandwa nguJesu wathi kuPhethro, “YiNkosi!” USimoni Phethro wonela ukuzwa esithi, “YiNkosi,” wazembathisa ngesigqoko sakhe sejazi (ngoba wayesikhumule) weqela emanzini. 8Abanye abafundi balandela ngesikepe behola umbule ugcwele izinhlanzi, ngoba babengakhatshana lokhumbi, kungaba yizinyathelo ezilikhulu. 9Ekufikeni kwabo okhunjini babona umlilo wamalahle uvutha kulenhlanzi phezulu, kanye lesinkwa. 10UJesu wathi kubo, “Lethani ezinye izinhlanzi elizibambileyo.” 11USimoni Phethro wakhwela esikepeni wadonsela umambule okhunjini. Wawugcwele izinhlanzi ezinkulu, zilikhulu lamatshumi amahlanu lantathu, kodwa loba zinengi kangaka umambule kawuqhewukanga. 12UJesu wathi kubo, “Wozani lizokudla.” Kakho kubafundi owaqunga isibindi sokumbuza athi, “Ungubani wena?” Bakwazi ukuthi kwakuyiNkosi. 13UJesu weza, wathatha isinkwa wabanika, wenza njalo langenhlanzi. 14Lesi kwase kuyisikhathi sesithathu uJesu evela kubafundi bakhe ngemuva kokuvuswa kwabafileyo.UJesu Ukhuthaza UPhethro
15Sebeqedile ukudla, uJesu wathi kuSimoni Phethro, “Simoni, ndodana kaJohane, ungithanda ngeqiniso na okudlula laba abanye?” Wathi, “Yebo, Nkosi, uyakwazi ukuthi ngiyakuthanda.” UJesu wathi, “Phana amazinyane ami ukudla.” 16UJesu waphinda wathi, “Simoni, ndodana kaJohane, uyangithanda ngeqiniso na?” Waphendula wathi, “Yebo, Nkosi, uyakwazi ukuthi ngiyakuthanda.” UJesu wathi, “Gcina izimvu zami.” 17Wasesithi kuye ngokwesithathu, “Simoni, ndodana kaJohane, uyangithanda na?” UPhethro wadabuka ngoba uJesu wambuza ngokwesithathu wathi, “Uyangithanda na?” Wathi, “Nkosi, uyazazi izinto zonke; uyakwazi ukuthi ngiyakuthanda.” UJesu wathi, “Phana izimvu zami ukudla. 18Ngikutshela iqiniso ngithi usesemutsha wawuzigqokisa ubophe ibhanti lakho, uziyele lapho othanda khona; kodwa uzakuthi nxa usuluphele uzakwelula izandla zakho, ugqokiswe ngomunye, akuhole akuse lapho ungathandi ukuya khona.” 19UJesu wakutsho lokhu ukubonisa indlela uPhethro ayezakhazimulisa uNkulunkulu ngayo. Wasesithi kuye, “Ngilandela!” 20UPhethro wanyemukula wabona umfundi lowo uJesu ayemthanda ebalandela. (Nguye lowo oweyama kuJesu esidlweni, owabuzayo wathi, “Nkosi, ngubani ozakunikela na?”) 21UPhethro wathi embona wathi, “Nkosi, kanti lo-ke?” 22UJesu waphendula wathi, “Aluba ngifuna ukuthi asale ephila ngize ngibuye kulani lawe lokho? Wena kumele ungilandele.” 23Ngenxa yalokhu, kwahungazwa phakathi kwabazalwane ukuthi umfundi lo wayengezukufa. Kodwa uJesu katshongo ukuthi wayengezukufa; wathi nje kuphela, “Uma ngifuna ukuthi asale ephila ngize ngibuye, kulani lawe lokho na?” 24Lo nguye umfundi ozifakazayo lezizinto, onguye owazibhala phansi. Siyazi ukuthi ubufakazi bakhe buqinisile. 25UJesu wenza ezinye izinto ezinengi njalo. Aluba zonke nganye zazingabhalwa phansi, ngibona ingathi lomhlaba wonke wawuzaswela indawo yezincwadi ezazingabhalwa.
Copyright information for
NdeIBE